पाण्याचा अंदाज चुकला की सुरक्षा व्यवस्थेचा अभाव? पंढरपूरच्या जलतरण तलावात २१ वर्षीय युवकाचा मृत्यू
राजस्थानच्या नरपतसिंगचा दुर्दैवी अंत; माजी नगरसेवक विक्रम शिरसट आक्रमक, ठेकेदारावर गुन्हा दाखल करण्याची मागणी
पंढरपूर :पंढरपूर शहरातील नगरपालिका जलतरण तलावात पोहताना एका २१ वर्षीय युवकाचा दुर्दैवी मृत्यू झाल्याची घटना समोर आली आहे. मिळालेल्या प्राथमिक माहितीनुसार **नरपतसिंग (वय २१, रा. असलाई, जि. जोधपूर, राजस्थान)** हा युवक जलतरण तलावात पोहत असताना पाण्यात बुडाल्याने त्याचा मृत्यू झाल्याचे समजते.
घटनेनंतर युवकाचा मृतदेह पंढरपूर उपजिल्हा रुग्णालयात आणण्यात आला. घटनेची माहिती मिळताच रुग्णालय परिसरात नागरिकांनी मोठी गर्दी केली होती. या घटनेमुळे जलतरण तलावातील सुरक्षा व्यवस्थेचा मुद्दा पुन्हा ऐरणीवर आला आहे.
*‘सुरक्षा व्यवस्था होती तरी कुठे?’ — विक्रम शिरसटांचा सवाल*
घटनेची माहिती मिळताच माजी नगरसेवक **विक्रम शिरसट** यांनी घटनास्थळी भेट देत आक्रमक भूमिका घेतली. युवकाचा पाण्याचा अंदाज न आल्याने मृत्यू झाल्याची शक्यता व्यक्त करतानाच जलतरण तलावातील सुरक्षेच्या उपाययोजनांची सखोल चौकशी करण्याची मागणी त्यांनी केली.
**“जलतरण तलावावर पुरेसे सुरक्षा कर्मचारी होते का? लाईफ जॅकेट किंवा बचावासाठी आवश्यक साधने उपलब्ध होती का? सीसीटीव्ही कॅमेऱ्यांमध्ये नेमके काय चित्रित झाले आहे, याची तपासणी झाली पाहिजे. नगरपालिका प्रशासनाने संपूर्ण प्रकरणाची चौकशी करून निष्काळजीपणा आढळल्यास संबंधित ठेकेदारावर मनुष्यवधास कारणीभूत ठरल्याचा गुन्हा दाखल करावा,”** अशी मागणी शिरसट यांनी केली.
सहा महिन्यांपूर्वीही अशीच घटना?
विशेष म्हणजे, सुमारे सहा महिन्यांपूर्वीदेखील याच जलतरण तलावात अशाच प्रकारची दुर्दैवी घटना घडल्याचा दावा करण्यात येत आहे. त्यामुळे वारंवार घडणाऱ्या या घटनांच्या पार्श्वभूमीवर जलतरण तलावातील सुरक्षा व्यवस्थेचे ऑडिट करण्याची मागणी जोर धरू लागली आहे.
**जलतरण तलाव पोहण्यासाठी खुला असताना प्रशिक्षित सुरक्षा कर्मचारी, जीवरक्षक, आपत्कालीन साधने, लाईफ जॅकेट आणि सीसीटीव्ही यंत्रणा कार्यरत होती का?** याची उत्तरे आता नगरपालिका प्रशासनाला द्यावी लागणार आहेत.
दरम्यान, या घटनेची अधिकृत कारणमीमांसा आणि जबाबदारी निश्चित करण्यासाठी संबंधित प्रशासन व पोलिसांकडून तपास करण्यात येत असून, तपासानंतरच मृत्यूचे नेमके कारण स्पष्ट होणार आहे.
**एका तरुणाचा जीव गेल्यानंतरही सुरक्षा व्यवस्थेत सुधारणा होणार नाही का?** असा सवाल या घटनेनंतर पंढरपूरकरांकडून उपस्थित केला जात आहे.
About the Author
